Ta consehabel pa no warda te na ultimo momento. Despues di e fecha aki no lo duna mas prolongacion di termino

ORANJESTAD – Siguientemente Servicio di Impuesto ta participa cu e ultimo dia pa entrega e
lista colectivo di salario (verzamelloonstaat) y e lista colectivo di pago na tercera persona
(verzamelstaat opgaaf derden) di aña 2009, ta 31 di maart 2010. Despues di e fecha aki lo
cuminsa procesa e cobransanan adicional inclui boet pa incumplimento.

Normalmente mester entrega e listanan menciona dia 31 di januari 2010, pero debi cu e aña aki
Servicio di Impuesto lo eherce control severo na momento di entregamento, a dicidi di duna
prolongacion di termino general te cu dia 31 di maart 2010. Asina e clientenan por haya mas
espacio pa yena nan listanan corectamente y completamente.

E prolongacion di termino ta sosode automaticamente pa tur cliente. Pues no tin mester di haci
peticion. Servicio di Impuesto ta duna e prolongacion aki un solo biaha. Despues di 31 di maart
2010 lo cuminsa procesa e cobransanan adicional (naheffingsaanslagen) inclui boet pa e
clientenan cu no a entrega e listanan menciona. Den e caso aki e boet pa incumplimento ta
maximo Afl. 10.000,-.

Servicio di Impuesto ta haci un apelacion na tur cliente pa entrega e listanan menciona mas
pronto posibel y no warda te na ultimo. Mester tene na cuenta cu ta tuma tempo pa controla e
listanan. Si warda te na ultimo ta nifica menos tempo pa haci coreccion, paramento den rij y e
ora e tempo di espera ta bira mas largo tambe.

GERENCIA DI SERVICIO DI IMPUESTO
28 di januari 2010