Mester uza e referencia di pago corecto

ORANJESTAD – Servicio di Impuesto ta participa na su clientenan cu ta paga loonbelasting via banco, cu e aña aki mester cumpli cu algun rekisito nobo na momento di efectua e pago.

Tur cliente cu a ricibi nan formularionan di declaracion di loonbelasting di aña 2010, por a ripara cu cada formulario ta contene tres referencia di pago (betalingskenmerk): uno pa loonbelasting, uno pa e prima di AOV/AWW y uno pa e prima di AZV. E referencianan di pago aki ta hopi importante pa menciona na momento di haci pago na banco. Es decir cu e cliente cu ta pagando via banco, sea personalmente of via internet, mester menciona e referencia di pago cu ta coresponde cu e belasting of prima cu e ta pagando. Esaki ta nifica cu pa cada pago mester haci tres transaccion: uno pa loonbelasting, uno pa prima di AOV/AWW y uno pa prima di AZV.
Pues awor no ta haci un solo transaccion di pago mas. Si acaso e cliente toch a haci un solo transaccion riba e referencia di pago di loonbelasting, e ora Servicio di Impuesto lo registra e pago aki completamente riba loonbelasting. Consecuentemente lo no bay tin ningun pago registra riba prima di AOV/AWW y AZV, locual por tin consecuencia negativo pa e cliente.

Si a haci e pagonan corectamente, despues Servicio di Impuesto por registra esakinan debidamente tambe. Pesey ta hopi importante pa tene cuenta cu e cambio aki y asina evita inconveniencia.
Pa mas informacion por consulta e documento ‘Infoblad loonbelastingpakket 2009/2010’ cu e clientenan a ricibi den nan pakete di loonbelasting. Por consulta e documento aki tambe riba e website www.siad.aw.

GERENCIA DI SERVICIO DI IMPUESTO
12 di februari 2010