Uzo di 'e-Verzamelstaat 2009' no ta obligatorio pero si ta altamente recomendabel

ORANJESTAD – Servicio di Impuesto ta participa na tur cliente cu den e dianan aki mester entrega e resumen di pago di salario y e resumen di pago na tercera persona di aña 2009, miho conoci como 'verzamelloonstaat' y 'verzamelstaat opgaaf derden', cu por uza e file digital 'e-Verzamelstaat 2009' sea pa procesa of controla e datonan concerni. Manera conoci, e aña aki Servicio di Impuesto lo eherce control severo na momento cu entrega e resumennan menciona. Haciendo uzo di e file 'e-Verzamelstaat 2009' e cliente lo yuda haci e proceso di control bay mas facil y rapido na momento di entregamento.

e-Verzamelstaat 2009
E file 'e-Verzamelstaat 2009' ta un MS Excel spreadsheet di Servicio di Impuesto cu ta contene dos 'worksheet': uno pa 'verzamelloonstaat' y uno pa 'verzamelstaat opgaaf derde' valido pa aña 2009. Tur cliente cu ta dispone di MS Excel version 2003 of mas nobo, por baha e file aki for di e website www.siad.aw via downloaden/zakelijk/formulieren en toelichtingen/loonbelasting y uza e spreadsheet aki libremente.

Uzo di e-Verzamelstaat 2009
'e-Verzamelstaat 2009' ta un instrumento cu tur cliente por uza; tanto e clientenan cu tin un programa di payroll como esnan cu no tin un programa. E clientenan cu no tin empleado den servicio, pero si a haci pago na tercera persona tambe por uza 'e-Verzamelstaat 2009'.

E clientenan cu tin un programa di payroll por pasa e datonan for di nan programa pa
'e-Verzamelstaat 2009' y asina controla si e datonan ta completo y corecto. Si esaki no ta e caso, e cliente lo mira di biaha unda tin fout y asina mesora e mes por haci e coreccionnan necesario.
E clientenan cu no tin un programa di payroll por uza 'e-Verzamelstaat 2009' pa procesa e datonan y asina produci e resumennan den forma digital. Di biaha e clientenan aki tambe por controla si tin fout y haci e coreccionnan necesario.

'e-Verzamelstaat 2009' ta e mesun spreadsheet cu Servicio di Impuesto ta uza pa controla e resumennan cu ta wordo entrega den forma digital. Uzo di 'e-Verzamelstaat 2009' no ta obligatorio pero si ta altamente recomendabel. Si un cliente uza e file aki pa e mes controla su datonan prome cu e bin entrega su resumennan, e por ta sigur cu e proceso di control na momento di entregamento lo bay hopi rapido. Pesey Servicio di Impuesto ta conseha tur cliente pa uza 'e-Verzamelstaat 2009' y evita cu ainda mester haci coreccion y asina spaar tempo.

Pa mas informacion relaciona cu uzo di e file 'e-Verzamelstaat 2009' por baha e guia aclaratorio 'Toelichting e-Verzamelstaat 2009' for di website www.siad.aw.
Pa informacion riba e puntonan cu mester tene cuenta cu nan na momento di yena e formularionan, por baha tambe e documentonan 'Toelichting indiening elektronische verzamelstaten 2009' y 'Toelichting indiening papieren verzamelstaten 2009'.

GERENCIA DI SERVICIO DI IMPUESTO
12 di maart 2010