ORANJESTAD – Recientemente Servicio di Impuesto a ricibi un veredicto di Corte pa Asunto Fiscal relaciona cu ‘Belasting op bedrijfsomzetten’ miho conoci como BBO. Hues fiscal a dicta cu BBO tin valides legal y tin forsa obligatorio. Aki ta sigui un splicacion mas amplio.
BBO tin valides legal y tin forsa obligatorio
Ta trata di un caso fiscal unda e cliente tawata di opinion cu e proceso di legislacion ora a introduci BBO no a bay corectamente y pesey e Ordenansa nacional di BBO lo no ta obligatorio. Pa e motibo aki e cliente no a paga BBO. Inspector di impuesto no tawata di acuerdo cu esaki y a impone cobransanan adicional. E cliente a bay den obhecion contra e cobransanan aki y despues a apela su caso. Awor hues fiscal a caba cu e discusion aki, door di duna un veredicto cu e cliente mester paga BBO y cu e cobransanan adicional cu inspector a impone ta husto.
Den su veredicto hues a duna di conoce cu Parlamento a aproba BBO. Despues, na nomber di gobierno, a manda e ley pa Gobernador kende a ratifica esaki. Esaki ta mustra claramente cu BBO a keda realisa segun ley. Un decision cu hues fiscal mester respeta.
Ta permiti cobra BBO riba exportacion
A base di e veredicto cu BBO tin valides legal, Corte pa Asunto Fiscal un biaha mas a dicta cu ta permiti cobra BBO riba exportacion, e asina yama ‘exportheffing’. E cliente den e caso aki tawata di opinion cu e ‘exportheffing’ di 1% di BBO lo no tin valides legal y lo ta contra derecho internacional. Sinembargo hues fiscal a duna di conoce cu esaki no ta e caso y a confirma un veredicto duna anteriormente.
A base di e veredicto di hues fiscal, dentro di poco e clientenan cu a entrega un obhecion similar, lo haya contesta.
GERENCIA DI SERVICIO DI IMPUESTO
31 di maart 2010