Ultimo dia tambe pa pidi prolongacion di termino

ORANJESTAD – Servicio di Impuesto ta recorda su clientenan cu diaranson, dia 1 di september 2010, ta e ultimo dia pa entrega e declaracion di winstbelasting 2009. E fecha oficial di otorgamento tawata dia 1 di juli 2010 y cada empresa cu a ricibi e formulario menciona a haya 2 luna pa yen’e y entreg’e. Ta sumamente importante pa tene cuenta cu e termino di 2 luna aki ya cu e empresa ta core risico di haya boet si no entrega e formulario of entreg’e laat.

Entregamento y control
Por entrega e declaracion na seccion Servicio pa cliente situa na oficina principal na Camacuri of Oficina di gobierno na San Nicolas.
Manera conoci, Servicio di Impuesto lo eherce control estricto na momento di entrega e declaracion. Esaki ta nifica cu no lo djis accepta e declaracion pero tambe lo controla mesora si e declaracion ta completamente yena.

Prueba di entregamento
Servicio di Impuesto ta pidi su clientenan pa trece un copia di e declaracion tambe ora di entregamento pa por pone un stempel riba dje. Esaki ta facilita e entregamento y e copia ta keda tambe como e prueba di entregamento pa e cliente. Si acaso e cliente no tin un copia, e lo haya un comprobante di entregamento. Ta remarca cu no ta duna servicio di saca copia.

Prolongacion di termino
Pa esnan cu no ta alcansa pa entrega su formulario mester tene cuenta cu diaranson, dia 1 di september 2010, ta ultimo dia tambe pa pidi prolongacion di termino. Lo no honra e peticionnan cu drenta despues di dia 1 di september 2010. Tur cliente cu haci un peticion pa prolongacion di termino lo ricibi despues un contesta por escrito di Servicio di Impuesto.

Evita boet
Yena y entrega e formulario di declaracion ta un deber di tur cliente registra pa winstbelasting. Pa medio di e declaracion e cliente tin oportunidad di declara su resultado di empresa. Keda sin entrega e declaracion ta nifica cu ta core risico di haya un cobransa taxativo cu boet pa incumplimento. E boet aki ta 5% di e impuesto cu un minimo di Afl. 250,- y maximo Afl.10.000,-. E boet aki ta conta tambe ora cu entrega e formulario laat.

GERENCIA DI SERVICIO DI IMPUESTO
31 di augustus 2010