donderdag 30 september 2010 - Te cu diasabra ta yuda yena e declaracion di inkomstenbelasting 2009
Oranjestad – Servicio di Impuesto ta recorda tur cliente cu mester di asistencia cu yenamento di e formulario di declaracion di inkomstenbelasting 2009, cu e campaña di ayudo ta continua te cu diasabra awor, dia 2 di oktober. Ta recomenda tur cliente interesa pa probecha di e oportunidad aki ya cu despues di diasabra Servicio di Impuesto no lo duna mas ayudo.
Alabes Servicio di Impuesto ta informa cu dialuna, dia 4 di oktober, ta ultimo dia pa entrega e declaracion menciona.
Kendenan por participa?
Servicio di Impuesto ta invita e pensionadonan y e personanan cu no tin un entrada bruto di mas cu Afl. 50.000,- pa aña. Si ta trata di pareha casa, e entrada bruto ta maximo Afl. 100.000,-.
Alabes, manera custumber, e campaña no ta pa persona cu tin negoshi of cu ta traha riba su mes por ehempel: doño di taxi/tourbus, compania di construccion, restaurant/snacktruck, oficina di administracion, pelukero etc. E grupo aki tin hopi mas rekisito administrativo y fiscal pa cumpli cu ne y ta miho pa un consehero yuda e personanan aki si acaso nan mes no por yena e formulario.
Na unda lo duna ayudo?
Servicio di Impuesto ta duna ayudo na Club Don Bosco na Noord y na su oficina principal na Camacuri.
Aki ta sigui un skema cu informacion di e campaña di ayudo
|
Fecha
|
Ayudo pa
|
Sitio
|
Orario
|
|
25 di sept – 2 di okt.
(diasabra tambe)
|
Tur cliente
|
Club Don Bosco – Noord y
Servicio di Impuesto - Camacuri
|
8:00 am – 3:30 pm nonstop
|
|
· Pa ricibi ayudo no tin mester di haci cita.
· Diasabra dia 2 di oktober tambe ta duna ayudo.
· No ta duna ayudo despues di dia 2 di oktober 2010.
|
Prepara documento
Servicio di Impuesto ta pidi tur cliente pa bin cu e formulario y tur documento necesario relaciona cu entrada tanto na Aruba como den exterior y e gastonan di aña 2009. Mester trece por ehempel: resumen di salario 2009, resumen di entrada di huur di cas, apartamento etc., carta di interes di banco y/of otro instancia, seguro di bida, resumen di pension di biehes, resumen di pago periodico pa huerfano y prueba di pago di alimentacion na excasa. Tambe ta recomenda pa e cliente mes yena e seccionnan cu ta trata su informacion personal y di su famia. Ta trata aki di e seccionnan 3, 4, 5 y 25.
Si acaso tin un yiu ta studia den exterior mester bin cu comprobante di inscripcion di scol y e recibonan di gasto paga por ehempel plac’i scol, material di estudio y/of gasto di pasashi pa e yiu bin Aruba. Ta importante pa inclui tur comprobante necesario den e declaracion.
Dia 4 di oktober ta ultimo dia
Servicio di Impuesto ta pidi tur cliente pa tene cuenta cu dia 4 di oktober 2010 ta ultimo dia pa entrega e formulario. Riba e fecha aki no lo duna ayudo pa yena e formulario.
Servicio di Impuesto ta conseha pa no keda sin yena y entrega e formulario di declaracion. Door di yena y entrega e formulario na tempo, e cliente por evita un cobransa taxativo. Ademas e tin oportunidad pa haci uzo di su derecho pa deduci e gastonan cu ta fiscalmente acceptabel. Si no entrega e formulario of entrega esaki laat, e cobransa lo inclui un boet di 5% di e impuesto cu un minimo Afl. 250,- y maximo Afl.10.000,-.
GERENCIA DI SERVICIO DI IMPUESTO
30 di september 2010