Oranjestad – Servicio di Impuesto ta informa tur cliente-comerciante, cu e paketenan di BBO pa aña 2011 a sali. Den e dianan venidero tur comerciante lo ricibi nan pakete via post. E comerciantenan cu nan empresa ta parti di un unidad fiscal y no ta e ‘moedermaatschappij’ no lo ricibi un pakete.
E pakete di BBO ta contene un guia aclaratorio y 12 formulario di declaracion, pues uno pa cada luna.
Obligacion di haci declaracion y pago
Tur cliente-comerciante tin e obligacion di yena y entrega e formulario di declaracion na Servicio di Impuesto y haci e pago conforme e declaracion. E obligacion aki ta conta tambe pa e comerciantenan cu ta cai bou dispensacion di BBO. E comerciantenan cu tin e asina yama ‘vrijgestelde omzet’ lo mester yena e suma di e ‘vrijgestelde omzet’ y entrega nan declaracion tur luna. Den caso di e clientenan cu no tawata tin benta durante luna mester entrega ‘nihil aangifte’.
Si henter e aña e cliente no ta spera benta, e cliente por entrega tur 12 formulario di declaracion den un solo biaha. Den caso di ‘vrijgestelde omzet’ of ‘nihil aangifte’ e cliente no lo mester paga BBO.
Empresa no activo of empresa nobo
E clientenan cu nan empresa no ta activo mas, mester acudi na Servicio di Impuesto, na seccion Servicio pa cliente, pa notifica esaki mas pronto posibel. Den un caso asina mester trece un prueba di Camara di Comercio cu ta mustra cu e empresa a cera.
E clientenan cu tin un empresa nobo tambe mester acudi na Servicio di Impuesto pa registra e empresa. Pa esaki tambe mester trece un prueba di Camara di Comercio.
Servicio di Impuesto ta recomenda pa controla si e pakete di BBO ta contene tur 12 formulario di declaracion y si cada un tin e imprenta corecto riba dje. Esaki ta hopi importante pa e declaracion y pago cu mester haci cuminsando na februari 2011.
GERENCIA DI SERVICIO DI IMPUESTO
25 di november 2011