Despues di 15 di februari cliente ta core risico di perde number

ORANJESTAD – Servicio di Impuesto ta informa cu diamars awor, 15 di februari, ta ultimo dia pa paga e impuesto di vehiculo di motor di aña 2011. Pa e fecha aki tur persona cu tin un vehiculo di motor (auto, bus, truck, brommer etc.) y ta haciendo uzo di caretera publico, mester tin por lo menos e prome kwartaal di aña paga y cu e plachi di number color cora cu blanco riba su vehiculo. Alabes ta asina cu despues di dia 15 di februari e cliente cu no a cumpli ta core risico di perde su number.

E clientenan por haci pago tanto na Servicio di Impuesto mes of via banco. E clientenan cu ta desea di paga via banco mester tene cuenta cu e condicionan prome cu haci pago. Pa loke ta trata e plachinan di number ta necesario pa presenta e prueba di pago y e prueba di seguro valido y original na momento di busca e plachinan. Si trece copia di seguro, esaki mester tin un stempel original di e compania di seguro of broker.

Pago na Servicio di Impuesto
E cliente cu ta desea di paga na Servicio di Impuesto por haci esaki sea na oficina principal na Camacuri of na un di e oficinanan di gobierno na San Nicolas, Savaneta, Santa Cruz of Paradera.
Manera ya anuncia, te cu dia 18 di februari e oficina principal na Camacuri ta habri non stop for di mainta 7:45 te cu atardi 3:30. E Oficinanan di gobierno den districto tambe ta keda habri merdia te cu 2:45pm.
Alabes Servicio di Impuesto ta recorda cu te cu dia 19 di februari ta duna servicio riba diasabra tambe na su oficina principal na Camacuri. E orario di servicio ta 8:00am te cu 2:00pm.

Pago via banco
E clientenan por haci pago via banco tambe. Den e caso aki e siguiente condicionnan ta aplicabel.

1. 1. E cliente por paga unicamente riba plachi di number A of MFA.
2. E cliente ta paga unicamente e impuesto di aña 2011. No ta permiti pa paga e impuesto di dos of mas aña fiscal den un solo transaccion.
3. E cliente ta paga e impuesto di ful aña 2011. No por haci pago pa solamente un of mas kwartaal di aña 2011.
4. E cliente mester tin e impuesto di aña 2010 completamente paga. Si ainda e cliente no a caba di paga e impuesto di aña 2010, e ora e mester acudi na Servicio di Impuesto pa haci pago.
5. No ta permiti pa paga e impuesto di dos of mas number den un solo transaccion.
6. E cliente cu ta desea di paga via internet, por haci esaki via e website di su banco manera custumber.

Tene cuenta:
E cliente cu tin plachi di nomber mester haci pago na Servicio di Impuesto mes, ya cu e mester haya un comprobante pa laga traha e plachinan.

Busca plachi di number
Na momento di busca e plachinan di number, e cliente mester presenta su comprobante di pago y e prueba di seguro valido manera ya menciona.
E cliente cu a paga na Servicio di Impuesto mes, por pasa busca su plachinan mesora. Pa e cliente cu a paga na Oficina di gobierno San Nicolas, e por scohe pa pasa busca su plachinan di number mesora na Camacuri of e ta palabra cu e cahero ki dia e ta busca su plachinan na San Nicolas mes. Den e caso aki e cliente por busca su plachinan despues di un siman.

Tene cuenta
E cliente cu a paga via banco no por busca su plachinan di number mesora, sino 3 dia despues di a haci pago.

Servicio di Impuesto ta conseha tur cliente pa tene cuenta cu na e momentonan aki ta falta solamente un paar di dia pa haci e pago segun ley. Diamars dia 15 di februari ta ultimo dia pa core cu e plachi di aña 2010. Despues di e fecha aki tur esnan cu no a haci pago di e impuesto y ta uzando nan vehiculo di motor riba caretera publico ta actuando contra ley. Alabes ta asina cu despues di dia 15 di februari si encaso Servicio di Impuesto no tin number mas disponibel pa bende, e cliente ta core risico di perde su number.
Pesey Servicio di Impuesto ta haci un apelacion na tur cliente cu ainda falta pa haci pago pa haci esaki mas pronto posibel y asina evita di haya boet y perde e number.

GERENCIA DI SERVICIO DI IMPUESTO
10 di februari 2011