Oranjestad – Dia 14 di april ultimo 'Global Forum on Transparency and Exchange of Information for Tax Purposes' cu ta forma parti di Organisacion pa Cooperacion Economico y Desaroyo (OECD), a publica un rapport positivo di Aruba. Cu e rapport aki Aruba ta mantene su lugar riba e ‘lista blanco’ di OECD. Por haya e rapport y e comunicado di prensa corespondiente di OECD riba e website di OECD: www.oecd.org.
Global Forum, di cual mas cu 100 estado di derecho ta forma parti di dje, tin e tarea di supervisa y pone na prueba e ehecucion di e normanan internacional riba tereno di transparencia y intercambio di informacion pa metanan fiscal. Na aña 2001 Aruba a compromete su mes cu OECD pa cumpli cu e normanan internacional fiscal aki.
Na aña 2010 OECD a cuminsa cu un investigacion profundo riba cumplimento di e normanan aki door di e miembronan di OECD y e asina yama 'committed jurisdictions'. E investigacion aki ta wordo conduci pa medio di un grupo yama 'Peer Review Group', unda e paisnan envolvi ta evalua otro cu sosten di e rapportnan traha door di e team di evaluacion di OECD.
Aña pasa, bou guia di Director di SIAD, sra. mr. R.R. Lopez-Hernandez hunto cu sra. mr. A.A. ten Hove di SIAD y sra. mr. E. Kuster y mr. R. Flanegien di High Commissioner di Aruba Financial Center, a start cu dunamento di informacion na OECD encuanto tur legislacion y regulacion di Aruba cu ta relevante pa e intercambio internacional di informacion fiscal. E team di evaluacion di OECD den deliberacion estrecho cu e personanan menciona akiriba, a elabora e informacion aki y a yega na un concepto di rapport di Aruba.
Na cuminsamento di maart 2011 durante un reunion na Paris di e 'Peer Review Group' (cu ta consisti di mas o menos 30 pais), Aruba y e team di evaluacion di OECD a defende e rapport aki. Durante e encuentro prof. mr. J.W. Bellingwout a fungi como representante di Aruba.
Dia 4 di maart ultimo e Peer Review Group a accepta e rapport cu algun adaptacion chikito.
Despues a presenta e rapport na mas cu 100 pais cu ta forma parti di Global Forum. Dia 14 di april ultimo Global Forum a aproba e rapport sin haci cambio y a publica esaki.
E resultado di e rapport ta cu e marco legislativo y reglamentario di Aruba relaciona cu transparencia y intercambio di informacion riba tereno fiscal riba tur punto cu a wordo investiga, ta cumpli cu e normanan internacional.
Pa loke ta trata algun elemento di e investigacion a duna algun recomendacion mas na cual Aruba mester pone atencion den e proximo aña manera: inmobilisacion di accionnan di portador, dunamento di informacion door di sociedadnan comanditario y fundacionnan, continuacion cu structuracion di e procedura pa intercambio internacional di datonan fiscal y continuacion cu ampliacion di e red di tratadonan di intercambio di informacion fiscal, e asina yama 'TIEA' (Tax Informacion Exchange Agreement).
Cu e rapport menciona Aruba ta e prome pais den Reino cu a wordo evalua den e cuadro aki y a logra un resultado positivo. E otro paisnan di Reino mester wordo evalua ainda.
GERENCIA DI SIAD
18 di april 2011