Si e declaracion no ta na ordo e cliente lo ricibi esaki bek pa haci coreccion.

ORANJESTAD – Servicio di Impuesto ta participa na tur cliente cu tin e deber di haci declaracion di loonbelasting tur luna, cu di awor padilanti lo bay controla e declaracion aki na momento di entregamento. E control ta necesario debi cu actualmente tin un cantidad grandi di declaracion cu no ta completamente y/of corectamente yena, locual ta causa tardansa den procesamento di e datonan y hasta por causa cu e cliente ta haya un cobransa adicional despues, mientras kisas facilmente por a evita esaki.

Reparatietoeslag y declaracion
Manera conoci, entrante 1 di januari 2011 a introduci 'reparatietoeslag'. En conexion cu esaki Servicio di Impuesto a haci cambio den e formulario di declaracion di loonbelasting, den cual e cliente ta declara por ehempel e cantidad di empleado cu a ricibi 'reparatietoeslag' y ta deduci e suma cu a paga na 'reparatietoeslag'.

Na cuminsamento di aña e clientenan a ricibi un guia aclaratorio cu mas splicacion riba 'reparatietoeslag' y e declaracion. No obstante, durante procesamento di e datonan a constata cu hopi declaracion no ta wordo yena completamente y/of corectamente. Hopi cliente no ta yena por ehempel: e suma total cu a paga na salario y e cantidad di empleado cu a ricibi 'reparatietoeslag', mientras cu ta deduci un suma na 'reparatietoeslag'. Alabes a constata cu e clientenan no ta comprende e sistema di deduccion di 'reparatietoeslag' y tin hopi eror den calculacion di e sumanan. Esaki ta causa cu na final ta paga sumanan cu no ta corecto.

Control
Tur cliente cu ta acudi na oficina principal na Camacuri pa entrega nan declaracion di loonbelasting riba e dianan 13 te cu 17 di juni lo mester pasa na balie F1, F2 of F3, unda lo eherce e controlnan necesario. Lo accepta e declaracion solamente si esaki ta corectamente y completamente yena. Si e declaracion no ta na ordo, e cliente lo ricibi esaki bek pa haci e coreccionnan necesario. Pesey ta recomendabel pa no warda te na ultimo pa entrega e declaracion.

Ayudo na cliente
Pa yuda e clientenan cu posiblemente tin dificultad cu yenamento di e formulario di declaracion di loonbelasting y principalmente cu e sistema di deduccion di 'reparatietoeslag', Servicio di Impuesto ta introduci un nota informativo y un programa digital traha den MS-Excel.
E nota informativo yama 'Infoblad reparatietoeslag' y ta obtenibel tambe na Papiamento. E nota aki ta duna un splicacion detaya riba 'reparatietoeslag' y yenamento di e formulario di declaracion.

E programa di MS-Excel yama 'Rekenhulp reparatietoeslag' y ta specialmente diseña pa preveni eror den calculacion. E programa aki no por controla exactitud di e declaracion den su totalidad, pero si por preveni hopi eror comun. E ta hopi facil pa traha cu ne y ta un bon instrumento di ayudo den cualkier administracion di empresa.

Servicio di Impuesto ta recomenda pa haci uzo di 'Rekenhulp reparatietoeslag' prome cu yena e formulario di declaracion di loonbelasting y prome cu haci cualkier pago. Despues por yena e cifranan y e resultadonan di calculacion den e formulario di declaracion y haci e pagonan corespondiente.

www.siad.aw
Por consulta e website www.siad.aw pa haya tur informacion relaciona cu declaracion di loonbelasting y 'reparatietoeslag'. Riba e pagina principal tur cliente por download e filenan 'Infoblad reparatietoeslag' y 'Rekenhulp reparatietoeslag' y uza esakinan den nan administracion.

Servicio di Impuesto ta haci un apelacion na tur cliente y specialmente e clientenan cu tin dificultad pa cu yenamento di declaracion di loonbelasting, pa haci uzo di e instrumentonan di ayudo y asina evita inconveniencia despues.

GERENCIA DI SERVICIO DI IMPUESTO
10 di juni 2011