E ultimo dia ta 31 di maart 2009

ORANJESTAD – Servicio di Impuesto ta participa na tur cliente cu tin e obligacion pa entrega e resumen di pago di salario (verzamelloonstaat) y e resumen di pago na tercera persona (verzamelstaat opgaaf derde) di aña 2008, cu e termino di entregamento a wordo prolonga. Awor e ultimo dia ta 31 di maart 2009. Entregamento di e formularionan ta obligatorio. Den caso di incumplimento por tin boet envolvi.

Prolongacion di termino
Den prome instante a stipula e ultimo fecha di entregamento pa dia 30 di januari proximo, pero awor a prolonga e termino cu 2 luna mas. E clientenan mes no tin mester di haci peticion pa prolongacion mas, ya cu e termino extra ta conta automaticamente pa tur cliente. Pues awor tur cliente ta haya 3 luna completo pa por cumpli cu entregamento di e formularionan menciona. Mester remarca si cu despues di dia 31 di maart 2009, no tin posibilidad di prolongacion di termino mas.

Resumen di pago di salario
Manera conoci tur doño di trabou cu tin empleado den servicio mester entrega – cada aña den luna di januari - un resumen di pago di salario (verzamelloonstaat) di e aña cu a pasa. E obligacion aki ta stipula den articulo 49 inciso 2 di e Lei General di Impuesto (ALB). Den e resumen aki e cliente ta declara tur informacion cu ta concerni pago di salario y e retencionnan haci di e empleadonan.

Resumen di pago na tercera persona
Tur aña – den luna di januari -  un empresa mester entrega tambe un resumen di tur loke el a paga na tercera persona (verzamelstaat opgaaf derden) durante e aña cu a pasa. Un tercera persona por ta un persona individual cu NO ta den servicio di e compania of un empresa cu a haci un trabou pa e compania y a ricibi compensacion. E obligacion ta stipula den articulo 49 inciso 3 di e Lei General di Impuesto (ALB).

Con por entrega e resumennan menciona
Tin 2 manera pa entrega e resumennan menciona:
1. e cliente ta yena y entrega e hardcopy di e formularionan cu el a ricibi via post;
2. e cliente ta entrega e informacion den forma digital uzando “LB-disk 2008” of un otro programa di payroll.

E cliente mes ta dicidi si e ta skirbi e datonan na man of e ta procesa e datonan digitalmente.
No ta importa cua manera e cliente ta scohe, pero den tur 2 caso, e mester entrega e documento (hardcopy) original firma bek.

LB-disk 2008
Servicio di Impuesto tin disponibel un asina yama “LB-disk 2008”. E LB-disk aki ta consisti di un spreadsheet (Excel) y ta contene 2 worksheet: uno pa e verzamelloonstaat y uno pa e verzamelstaat opgaaf derden. E clientenan cu NO tin un programa di payroll por haci uzo di e spreadsheetnan aki pa yuda nan yena y/of entrega e documentonan menciona digitalmente. E clientenan por baha e LB-disk 2008 for di e website: www.siad.aw. Mester remarca cu no ta posibel pa uza e LB-disk 2008 pa un otro aña. Uzo di e LB-disk 2008 no ta obligatorio.

Aclaracion LB-disk 2008
Riba e website menciona tin tambe un aclaracion (Toelichting LB-disk 2008) pa yuda e clientenan cu kier uza e LB-disk 2008. Ta consehabel pa consulta e aclaracion aki ya cu e ta contene informacion mas detaya. Den caso cu ainda e cliente no ta sali afo, e ora e por tuma contacto cu Servicio di Impuesto na telefon 522-7423, seccion “Ondernemingen” pa yudansa.

Kico ta pasa si no entrega of no entrega e resumennan na tempo?
Si e cliente no cumpli cu su obligacion di entrega e resumennan menciona, e ta core risico pa haya boet te na un maximo di Afl. 10.000,-. Esaki ta stipula den articulo 56 di Ley di Impuesto General (ALB). Servicio di Impuesto lo impone e boet segun su maneho di boet stipula den paragraf 25 di e documento “Boetebeleid Belastingdienst Aruba 2004”. E maneho di boet aki ta disponibel riba e website www.siad.aw. E boet ta depende cuanto empleado of tercera persona e cliente tin. E boet ta depende tambe pa kico tawata tin incumplimento: sea ta pa entregamento laat of no entregamento.
Servicio di Impuesto ta conseha e clientenan cu tin e deber pa entrega e “verzamelloonstaat” y e “verzamelstaat opgaaf derden”, pa entrega e documentonan aki na tempo y asina evita e boet di incumplimento.

GERENCIA DI SERVICIO DI IMPUESTO
29 di januari 2009