Relaciona cu e declaracionnan di impuesto por ehempel esunnan di loonbelasting/prima di seguro di AOV/AWW/AZV, BBO, logeerbelasting y speelvergunningsrecht, inkomstenbelasting y winstbelasting, Servicio di Impuesto ta pidi su clientenan pa semper entrega e formulario original cu nan a ricibi via post.

ORANJESTAD – Relaciona cu e declaracionnan di impuesto por ehempel esunnan di loonbelasting/prima di seguro di AOV/AWW/AZV, BBO, logeerbelasting y speelvergunningsrecht, inkomstenbelasting y winstbelasting, Servicio di Impuesto ta pidi su clientenan pa semper entrega e formulario original cu nan a ricibi via post.
No ta permitibel pa entrega un copia di e declaracion of e version cu ta baha for di internet. E declaracion (aangifte) cu ta wordo publica riba e website ta unicamente pa uzo propio di e cliente. Tampoco ta permitibel pa manda e declaracion via fax.

Semper uza e formulario corecto
Manera custumber un cliente ta ricibi un pakete cu declaracion pa cada tipo di impuesto. Cada formulario tin un sticker cu ta contene tambe un codigo. Esaki ta un number unico cu informacion di e cliente y e periodo di declaracion. Pesey ta sumamente importante pa e cliente uza e formulario original cu ta coresponde cu e periodo di declaracion, sino ora di scan e “barcode” por resulta cu e declaracion ta wordo procesa pa un otro periodo locual por tin consecuencia indesea.

Semper entrega e declaracion na Servicio di Impuesto
Manera conoci e declaracionnan mester wordo entrega na Servicio di Impuesto mes. E cliente ta entrega su declaracion sea personalmente na e seccion di informacion na Camacuri of San Nicolas of e ta  deposita e documento den e postbus na Camacuri. Alabes ta posibel pa manda e declaracion via post. Mester tene cuenta cu no por entrega e formulario na banco si acaso e cliente ta haci pago via banco.

Saca copia / prueba di entregamento
Servicio di Impuesto ta pidi su clientenan pa nan mes saca copia di e formulario di declaracion y bin cu ne hunto cu esun original na momento di entregamento. E ora Servicio di Impuesto lo pone un stempel riba e copia cu lo keda como prueba di entregamento pa e cliente.

GERENCIA DI SERVICIO DI IMPUESTO
12 di januari 2009