Hasta cu posibilidad cu no tin mester di paga interes y haya rebaho riba boet

ORANJESTAD – Servicio di Impuesto recientemente a introduci un areglo di pago mas flexibel pa tur persona individual. Basicamente esaki kier men cu a amplia e terminonan den cual por paga un debe di belasting of erfpacht. Alabes Servicio di Impuesto por brinda incentivonan na e persona cu haci un 'downpayment' di 25% of mas riba su debe. Esaki por nifica cu e suma cu e persona lo mester paga na final lo baha considerablemente.

Termino di pago mas largo
Awor un persona individual por haya un areglo di pago di maximo 12, 24 of hasta 48 luna dependiendo con halto su debe ta y con su situacion financiero ta. Asina e persona ta haya mas espacio pa e por cumpli cu pago di su debenan cu e tin cu Servicio di Impuesto.

Ta brinda incentivonan atractivo
Banda di haya termino di pago mas largo, un persona individual por haya e posibilidad di no tin mester di paga un parti di e interes y haya rebaho di boet cu por tin riba su cobransa. Kier men e suma cu e persona lo mester paga na final, por bira hopi menos. Pa haya e incentivonan aki, e siguiente condicionnan ta aplicabel:
1. E areglo di pago ta entre 13 y 48 luna. E cantidad di luna di e areglo ta depende di e capacidad di pago di e persona y si tin un circunstancia particular.
2. E persona ta haci un 'downpayment' di 25% of mas riba su debe.

Beneficionan di un areglo di pago
Un areglo di pago tin e siguiente beneficionan:
1. Termino di pago mas largo.
2. Posibilidad di haya rebaho riba boet.
3. Posibilidad di no paga un parti di e interes acumula.
4. Ta para futuro calculacion di interes durante periodo di areglo.
5. Ta para tur ehercisio pa cu cobramento por ehempel: no ta manda aanmaning y no ta pone 'beslag' riba salario, tanten cu ta cumpli cu e areglo di pago y no tin indicacion cu e cliente ta trata di perhudica e caha di gobierno.

Haci peticion por escrito
Pa tur areglo di pago ta rekeri un peticion por escrito. Pa areglo di maximo 12 luna por pasa na servicio pa cliente sea na oficina principal na Camacuri of Oficina di gobierno na San Nicolas. Pa areglo di mas cu 12 luna, mester haci un cita cu un cobrado di impuesto y yena e formulario 'DB 35'. E formulario aki ta obtenibel tambe riba e website www.siad.aw. Pa haci e cita mester yama na telefon 522-7423 y duna e 'persoonsnummer'.

Actua awor
No laga debe di belasting keda acumula. Esaki lo bira mas dificil pa paga despues. E areglo di pago flexibel ta un oportunidad unico pa elimina debe di belasting atrasa y haya posibilidad di baha e debe considerablemente. Pesey actua awor; dal e prome paso; yega na Servicio di Impuesto y haci e peticion. E personal ta cla pa sirbi tur persona y lo sa di duna tur guia necesario.

Pa informacion mas detaya por acudi na Servicio di Impuesto of consulta e notanan informativo riba www.siad.aw.

GERENCIA DI SERVICIO DI IMPUESTO
13 di februari 2012