Registra prome cu 1 di juni y evita cobransa di 5 aña atras

ORANJESTAD – Relaciona cu e ley di grondbelasting, siguientemente Servicio di Impuesto ta duna e siguiente informacion.
Ta asina cu propietario di un propiedad inmobil mester paga grondbelasting. Pa esaki e propiedad por ehempel cas, edificio comercial of tereno, mester ta registra na Servicio di Impuesto. Di acuerdo cu e maneho actual, si e propiedad ta existi varios aña caba, e propietario por haya cobransa di 3 aña atras. Pero entrante 1 di juni 2012 lo implementa un maneho nobo unda e propietario por haya cobransa di 5 aña atras. Pesey Servicio di Impuesto ta haci un apelacion na tur propietario di un propiedad inmobil cu ainda no a registra su propiedad, pa haci esaki prome cu 1 di juni 2012. Pa registra e propiedad ta importante pa pasa na Servicio di Impuesto y trece e documentonan necesario. Aki ta sigui mas informacion.

Ken ta paga grondbelasting?
E propietario di un propiedad inmobil cu tin e propiedad registra riba su nomber dia 1 di januari, tin cu paga grondbelasting. Esaki ta nifica cu si a bende un propiedad den transcurso di aña, esaki no tin influencia riba e cobransa di grondbelasting di e aña ey.
E cliente cu tin un tereno den erfpacht (cu of sin edificio riba dje) tambe lo por bin na remarca pa paga grondbelasting. Den e caso aki e cliente ta paga tanto e canon di erfpacht como grondbelasting.

Registra un propiedad
Si un propiedad inmobil no ta registra pa grondbelasting, por haci esaki na seccion di grondbelasting. Pa e registracion ta necesario pa trece un rapport di taxacion no mas bieu cu 5 aña. Si no tin e rapport aki, mester trece e acta di notario cu ta mustra kende ta doño huridico di e propiedad. Tambe mester trece e polisa di seguro di candela y mapa entrega na DOW. Si tin un ‘situatietekening’ lo ta bon tambe pa pone esaki hunto cu e demas documentonan.

Despues di registracion
Despues di registracion lo evalua e documentonan y stipula e balor di e propiedad. Di acuerdo cu e maneho actual, si e propiedad ta existi pa varios aña caba, e cliente lo por haya cobransa di 3 aña atras. Pero entrante 1 di juni 2012 e maneho aki lo cambia. Si registra e propiedad despues di 1 di juni 2012, e cliente lo por haya cobransa di 5 aña atras.

Si no registra e propiedad
Si acaso e propietario no registra su propiedad inmobil riba iniciativa propio, e lo por haya cobransa taxativo cu por bay 5 aña atras. Den un caso asina inspector mes lo stipula e balor di propiedad segun propio evaluacion.

Mas informacion
Pa registracion di propiedad inmobil of informacion, por acudi na Servicio di Impuesto y puntra pa un funcionario encarga cu grondbelasting.

GERENCIA DI SERVICIO DI IMPUESTO
21 di februari 2012