Huidige artikelen
donderdag 16 april 2009 - Servicio di Impuesto tin procedura nobo pa cu declaracion di belasting ora ta trece artista for di exterior
Pa tur empresario cu kier trece artista for di exterior.
ORANJESTAD – Servicio di Impuesto ta participa na tur cliente, specialmente e promotornan cu ta trece artista for di exterior, cu tin un procedura nobo pa cu declaracion di belasting di artista, miho conoci como “artiestenbelasting”. Ta asina cu tur empresario cu ta desea di trece un artista for di exterior mester haci declaracion y paga e belasting menciona. Den cuadro di stipulacion di e belasting aki, Servicio di Impuesto ta introduci un procedura nobo y esaki ta como lo siguiente.
Procedura nobo
E procedura nobo ta encera cu e empresario mester haci un cita prome cu e funcionario encarga cu stipulacion di e belasting. Riba e dia di e cita, e empresario ta duna informacion adicional y ta presenta tur e documentonan rekeri. Finalmente Servicio di Impuesto lo stipula e suma di belasting cu mester paga y lo otorga e cobransa concerni. Despues di haci pago, e empresario por acudi na DIMAS pa ricibi su permiso. Aki ta sigui un skema di e procedura nobo.
|
Procedura nobo pa cu declaracion di belasting di artista
Pa tur empresario cu kier trece artista for di exterior
|
|
1. Haci un cita
Yama Servicio di Impuesto na telefoon 522-7423 extension 646 pa haya
e funcionario encarga cu belasting di artista. Mester haci e minimo cita
dies (10) dia prome cu fecha di concierto of actuacion di artista.
|
|
2. Acudi personalmente na Servicio di Impuesto riba dia di e cita
E empresario ta duna informacion adicional y ta entrega e documentonan
menciona akibou:
1. copia di peticion di “werk- en verblijfsvergunning” di DIMAS;
2. copia di “buffetvergunning en evenementenvergunning”;
3. copia completo di contracto firma door di ambos partido;
4. copia di comprobante di identidad (cedula, rijbewijs of paspoort);
5. si ta trata di un empresa, e persona autorisa mester trece copia di
carta di autorisacion di e empresa;
6. copia di registracion na Camara di Comercio;
7. copia di mapa di e sitio unda e actuacion (concierto) di e artista lo
tuma lugar.
|
|
3. Busca cobransa y haci pago
Dentro di 10 dia di trabou despues cu e cita a tuma lugar, e empresario
por pasa busca e cobransa y haci pago di e belasting. Despues e
empresario por acudi na DIMAS pa busca su permiso.
|
Servicio di Impuesto ta pidi tur empresario cu proximamente ta bay trece un of mas artista for di exterior pa tuma bon nota di e procedura nobo aki pa evita cualkier malcomprondemento.
GERENCIA DI SERVICIO DI IMPUESTO
16 di april 2009