E fecha oficial di otorgamento ta 1 di mei 2009

ORANJESTAD – Servicio di Impuesto ta informa cu e formularionan di declaracion di impuesto di entrada (inkomstenbelasting) 2008 a sali. Durante e luna di april aki e clientenan registra lo ricibi nan formulario via post manera custumber. E fecha oficial di otorgamento ta 1 di mei 2009 y pa e fecha aki tur cliente mester a ricibi nan formulario. Un cliente ta haya 2 luna pa yena y entrega su formulario. E ultimo dia pa entrega esaki ta 1 di juli 2009.

Cambio di situacion personal
Por sosode cu mientrastanto a bin cambio den e situacion personal di un cliente por ehempel:
• e cliente a cambia di adres;
• e cliente a casa;
• e cliente a separa di su casa durante aña 2008: esaki ta importante pa e ex-señora eventualmente
   por ricibi su mesun formulario;
• e cliente a fayece;
• e cliente a bandona Aruba.
E casonan aki ta rekeri pa haci cambio den e registro di cliente, locual por tin consecuencia pa cu e otorgamento di e formulario di declaracion menciona.
Si acaso un cliente tin cambio den su situacion personal y ainda e no a notifica Servicio di Impuesto di esaki, ta pidi e cliente aki (of famia di e fayecido) pa acudi na Servicio di Impuesto mas pronto posibel. E cliente por acudi sea na oficina principal na Camacuri of Oficina di gobierno na San Nicolas. Den caso di cambio di adres, mester yena e formulario “Opgaaf adres & telefoon particulieren” cual ta obtenibel tambe riba e website www.siad.aw.
Semper mester trece copia di un prueba di identificacion (cedula, rijbewijs, paspoort) pa por haci cualkier cambio den registro.

Prepara documento
Servicio di Impuesto ta recomenda pa ya caba cuminsa prepara tur documento necesario relaciona cu entrada y gasto di aña 2008 por ehempel: salario anual, entrada di huur di propiedad, carta di interes di banco y/of otro instancia, seguro di bida, comprobante di donacionnan haci, comprobante di gastonan di scol di yiu cu ta studia den exterior etc. Na e pensionadonan di SVB ta recomendabel pa nan busca un carta di SVB cu ta duna informacion di e pension di biehes, pension di viudo of pension di huerfano di aña 2008.

Empresa propio
Servicio di Impuesto ta recorda tur cliente kendenan tin un empresa propio (eenmanszaak), pa nan tambe prepara nan relato anual di aña 2008. Den caso cu e cliente mes no por traha e relato anual aki, ta recomendabel pa busca un consehero.

Trece copia
Semper mester entrega e formulario original bek na Servicio di Impuesto. Ora di entregamento no mester lubida di trece tambe un copia di e declaracion. Asina e cliente por haya un stempel riba su copia cual ta indica e prueba di entregamento.

Yena y entrega e formulario ta un obligacion legal. Door di yena y entrega e formulario na tempo, e cliente ta evita cu e ta haya un cobransa (taxativo) cu boet. E boet ta 5% di e suma di belasting y ta minimo Afl. 250,- y maximo Afl. 10.000,-. Ademas pa medio di e declaracion, e cliente ta haya e oportunidad pa haci uzo di su derecho door di deduci su gastonan. Si ainda e cliente no tin tur documento cla, ta consehabel pa haci lihe cu e preparacionnan pa no cay laat cu e entregamento.

GERENCIA DI SERVICIO DI IMPUESTO
7 di april 2009