Pa haya posibel dispensacion di impuesto pa e siguiente kwartaal

ORANJESTAD – Servicio di Impuesto ta participa cu diamars, dia 31 di maart, ta ultimo dia pa entrega e plachinan di number di aña 2009 di e vehiculonan cu no ta den uzo.

E condicionnan
Ta asina cu un cliente cu tin un vehiculo cu no ta den uzo y cu no lo bay ta den uzo pa un tempo, e no lo tin mester di paga e impuesto di un of mas kwartaal durante aña, solamente si e cliente a cumpli cu e siguiente condicionnan.
1. E cliente a entrega e plachinan di number na Servicio di Impuesto prome cu e kwartaal cuminsa y
2. E plachinan a keda aden pa un kwartaal of mas durante aña.

Entregamento di e plachinan
Un cliente por entrega e plachinan di number sea na oficina principal na Oranjestad of na un Oficina di gobierno den districto.
E cliente ta acudi cerca un cahero pa yena y firma un formulario. Pa medio di e formulario e cliente ta declara cu e ta entrega e plachinan di su vehiculo. Alabes e cliente ta duna e motibo pakico e ta entrega e plachinan por ehempel: pa motibo di biahe largo, vehiculo ta daña etc.

Si doño di vehiculo a fayece
Den caso cu doño di e vehiculo a fayece, ta posibel cu un miembro di famia ta entrega e plachinan di e vehiculo concerni. Alabes ta posibel cu e casa di e fayecido ta autorisa un persona pa haya e number. Eventualmente e herederonan tambe por laga pasa e number riba nomber di e persona cu nan ta desea. Tur e herederonan mester firma pa e traspaso di number y nan ta apodera un persona pa regla esaki. Servicio di Impuesto tin e formulario “Verklaring van geen bezwaar bij voertuig overdracht” cu e herederonan por uza. Despues ta entrega e carta di apoderacion y un notificacion di fayecimento di Censo.

Ta reserva e number pa e aña fiscal coriente
Servicio di Impuesto ta warda e plachinan di number solamente pa aña fiscal 2009. Durante e periodo aki ta reserva e number tambe pa e doño di e vehiculo. Despues di e aña fiscal aki, e cliente ta core riesgo di perde su number si acaso e no reacciona.

Periodo cu e plachi ta keda aden
E dispensacion di impuesto ta depende tambe di con largo un cliente ta laga su plachinan di number aden. Solamente si e plachinan a keda aden pa un kwartaal of mas completo, e ora e cliente no lo tin mester di paga e impuesto di e periodo concerni. Por ehempel: si e vehiculo ta daña pa un luna so durante un kwartaal y e doño a busca e plachinan bek, e ora toch e mester paga e impuesto di e kwartaal ey completamente. E dispensacion no ta conta pa cada luna cu e plachi a keda aden sino pa cada kwartaal di aña.

No tin dispensacion cu forsa retroactivo
No ta duna dispensacion di impuesto cu forsa retroactivo. Esaki ta debi cu mester paga e impuesto delanta. Un cliente cu entrega su plachinan na e momentonan aki no por haya dispensacion mas pa e prome kwartaal di aña 2009 (januari, februari y maart) debi cu e kwartaal aki a pasa caba.

Dispensacion na e momentonan aki
Manera ya menciona, pa haya dispensacion di impuesto e cliente mester haci un declaracion y entrega su plachinan di number prome cu e kwartaal cuminsa. E plachinan di number cu keda entrega na e momentonan aki lo por cai bou dispensacion di impuesto pa e di dos kwartaal, esta april, mei y juni 2009. Manera menciona e cliente mester tene cuenta si, cu den caso e busca su plachinan bek durante e kwartaal aki, esta durante e luna di april, mei of juni, e cliente lo mester paga e di dos kwartaal toch completamente.

E dispensacion no ta conta pa e gasto di e plachinan
Un cliente por haya dispensacion pa e impuesto solamente y no pa e gastonan di e plachinan. Semper e cliente lo mester paga Afl. 20,- pa gasto di e plachinan.

GERENCIA DI SERVICIO DI IMPUESTO
30 di maart 2009