ORANJESTAD – Relaciona cu e cobransa di grondbelasting 2009 cu a sali recientemente, siguientemente Servicio di Impuesto ta duna mas informacion riba e tipo di belasting aki.
Ken ta paga grondbelasting?
Tur doño di un bien inmobil (propiedad) riba dia 1 di januari ta paga grondbelasting. Pues, den caso cu a bende un propiedad den transcurso di aña, esaki no tin influencia riba e cobransa di grondbelasting di e aña ey.
Ademas ta asina cu e cliente cu tin un tereno erfpacht (cu of sin edificio riba dje) tambe lo por bin na remarca pa paga grondbelasting. Den e caso aki e cliente ta paga tanto e canon di erfpacht como grondbelasting.
Con ta determina e cobransa?
En principio ta determina e cobransa a base di e balor di e bien inmobil. Pa esaki ta tuma como punto di salida:
1. e balor riba mercado liber. Pues e balor di e propiedad si bend’e bou circunstancia normal of
2. ta uza e balor di huur anual bou circunstancia normal.
Circunstancia normal ta nifica: e prijs normal y no e prijs cu ta duna na famia of amigo.
Mester remarca si, cu por tin cambio den calculacion di e balor segun e dos puntonan ariba menciona, depende e situacion (condicion) di e propiedad.
Periodo di 5 aña
E balor di un propiedad ta conta pa un periodo di 5 aña. Na cuminsamento di e periodo di 5 aña ta stipula e balor di e bien inmobil y cada aña lo uza e mesun balor aki pa e siguiente 5 añanan. E periodo actual ta core for di aña 2007 te cu aña 2011. Pues aworaki, aña 2009 ta e di tres aña di e periodo actual. Pa e aña 2007 Inspector a reevalua e balor di cada propiedad, cual lo keda valido te cu aña 2011. Esaki ta nifica cu e cobransa di aña 2007, 2008, 2009, 2010 y 2011 lo ta mescos si no bin cambio den balor di e propiedad.
Cambio di balor
Den caso cu durante e periodo di 5 aña e situacion of condicion di e propiedad a cambia di tal forma cu esaki tin consecuencia pa su balor, e ora Inspector por cambia e balor registra di e propiedad ey durante e periodo di 5 aña. Un propiedad por cambia di balor por ehempel door di construccion adicional (bijbouw), renobacion of destruccion (p.e. debi na candela of mal tempo). Cambio den destinacion di e propiedad tambe por tin consecuencia pa e balor. Por ehempel: a dicidi pa uza un cas of parti di un cas pa un negoshi (speelschool, restaurant, kapsalon).
Tarifa / dispensacion
For di e balor total di e biennan inmobil ta kita e suma di Afl. 60.000,= como dispensacion. Es decir riba e parti aki no ta paga belasting. Cada contribuyente ta haya e dispensacion un solo biaha riba e balor total di su propiedadnan. Despues di deduci e suma di Afl. 60.000,- for di e balor total, ta cobra e impuesto (grondbelasting) segun e tarifa di 0,4%.
Ehempel:
Balor total di e propiedadnan Afl. 225.000,-,
Kita: Afl. 60.000,- (dispensacion)
Resto: Afl. 165.000,-
E grondbelasting ta Afl. 660,- (0.4% di 165.000).
Kico pa haci ora un propiedad ta bashi y no ta den uzo?
Den caso cu un edificio of cas ta bashi y no ta den uzo, ta posibel pa e cliente pidi dispensacion di grondbelasting. E ora e no mester paga grondbelasting durante e periodo den cua e edificio of cas a keda bashi. Den un situacion asina ta bon pa e doño(nan) acudi na e seccion di grondbelasting pa e posibilidadnan y e condicionnan stipula pa e casonan aki.
Si e propiedad no ta registra
Si un cliente tin un propiedad cu no ta registra pa grondbelasting, ta consehabel pa e registra e propiedad na Servicio di Impuesto, seccion di grondbelasting. Esaki ta necesario pa evita cu e cliente ta haya su mes confronta cu un cobransa pa cada aña cu falta y cu por bay te 5 aña atras.
Obhecion
Si un contribuyente no ta di acuerdo cu su cobransa, e por entrega un carta di obhecion, den cual e ta splica na un manera cla cua ta e motibonan di su obhecion. Tambe e por pidi inspector pa scuch’e prome cu tuma un decision. Ta recomendabel pa e cliente pone un number di telefon den su carta. Asina e seccion di grondbelasting por tuma contacto cu e cliente, principalmente si ta trata di un caso pa cual mester haci inspeccion na un of mas propiedad.
Pa loke ta e cobransa di aña 2009, mester entrega e carta di obhecion no mas laat cu dia 31 di augustus 2009 ya cu dia 30 di augustus ta cai riba diadomingo.
Obhecion riba e cobransa di aña 2009
En principio un cliente por a haci obhecion solamente pa aña 2007 debi cu aña 2007 tawata e prome aña di e ciclo di 5 aña. Solamente si den aña 2009 aki, a presenta un situacion extraordinario por ehempel renobacion of destruccion (candela/mal tempo) cu a causa un cambio considerabel na balor di e propiedad, e ora e cliente por haci obhecion pa aña 2009. Pa mas informacion riba esaki por yama seccion Grondbelasting of acudi na Servicio di Impuesto.
Pospone pago den caso di obhecion
Den caso cu e cliente a entrega un carta di obhecion, tambe ta posibel pa e haci un peticion pa pospone e pago (uitstel van betaling) riba e cobransa. Por pospone e pago sea completamente of parcialmente te ora Inspector tuma un decision riba e obhecion. Esaki lo evita gasto extra por ehempel gasto di aanmaning of dwangschrift.
Servicio di Impuesto tin un formulario pa haci e peticion pa pospone pago, cual ta obtenibel na e seccion di servicio pa cliente. Tambe ta posibel pa haya e formulario via e website: www.siad.aw. Servicio di Impuesto ta dicidi si ta honra of no e peticion pa posponemento di pago.
Apelacion
Despues cu Inspector tuma un decision riba e obhecion, e cliente tin chens pa bay hues si ainda e no ta di acuerdo cu e decision di Inspector riba su obhecion. E ora e cliente mester entrega un carta di apelacion na Corte di Apelacion pa Asunto Fiscal (Raad van Beroep voor Belastingzaken), situa na Wilhelminaplein 4, Willemstad, Corsou of na Corte den Prome Instancia (Gerecht in Eerste Aanleg) situa na Wayaca 33-E, Aruba. E cliente mester tene cuenta si, cu mester entrega e carta di apelacion dentro di 2 luna despues di fecha di e decision di Inspector.
Mas informacion
Pa mas informacion encuanto e balor stipula riba e cobransa, e cliente por acudi na Servicio di Impuesto y puntra pa un funcionario encarga cu grondbelasting.
Pa tur asunto relaciona cu pago di e cobransa por ehempel: areglo di pago, e cliente mester acudi na seccion Servicio pa cliente na oficina principal situa na Camacuri 2 of na Oficina di gobierno na San Nicolas.
GERENCIA DI SERVICIO DI IMPUESTO
29 di mei 2009