Ta recomenda tur cliente interesa pa cuminsa prepara tur documento

Oranjestad - E aña aki mescos cu e añanan anterior, Servicio di Impuesto ta organisa un campaña pa yuda tur persona cu mester di asistencia cu yenamento di e formulario di declaracion di inkomstenbelasting. E campaña aki lo cuminsa dia 15 di juni proximo y lo continua te cu dia 30 di juni. Ta recomenda tur cliente interesa pa cuminsa prepara tur documento necesario, pa facilita e proceso di ayudo. Mester tene cuenta cu e ultimo dia pa entrega e formulario ta 1 di juli proximo y riba e dia aki no lo duna ayudo.

Kendenan por participa?
Servicio di Impuesto ta invita e pensionadonan y e personanan cu no tin un entrada bruto di mas cu Afl. 50.000,- pa aña. Si ta trata di pareha casa, e entrada bruto ta maximo Afl. 100.000,-.
Alabes, manera custumber, e campaña no ta pa persona cu tin negoshi of cu ta traha riba su mes por ehempel: doño di taxi/tourbus, compania di construccion, restaurant/snacktruck, oficina di administracion, pelukero etc. E grupo aki tin hopi mas rekisito administrativo y fiscal pa cumpli cu ne y ta miho pa un consehero yuda e personanan aki si acaso nan mes no por yena e formulario.

Na unda lo duna ayudo?
Servicio di Impuesto lo duna ayudo na YMCA na San Nicolas, Club Don Bosco na Noord y na su oficina principal na Camacuri (local banda di unda ta busca number di auto). Pa ricibi ayudo no tin mester di haci un cita. E orario ta tur dia - di dialuna pa diasabra - for di 8:00 mainta te cu 3:30 atardi non stop. Den e siman di dia 15 di juni lo yuda tur pensionado parti mainta y parti merdia lo yuda e demas clientenan. Riba diasabra, dia 20 y 27 di juni, Servicio di Impuesto lo ta presente tanto na YMCA San Nicolas como na Servicio di Impuesto na Camacuri.

Aki ta sigui un skema cu informacion di e campaña di ayudo 

Prepara documento
Servicio di Impuesto ta recomenda tur cliente pa ya caba cuminsa prepara tur documento necesario relaciona cu nan entrada tanto na Aruba como den exterior y e gastonan di aña 2008 por ehempel: resumen di salario 2008, resumen di entrada di huur di cas, apartamento etc., carta di interes di banco y/of otro instancia, seguro di bida, carta di SVB encuanto pension di biehes/huerfano, prueba di pago di alimentacion na excasa, informacion personal di casa y yiunan. Si acaso tin un yiu ta studia den exterior mester bin cu comprobante di inscripcion di scol y e recibonan di gasto paga por ehempel plac’i scol, material di estudio y/of gasto di pasashi pa e yiu bin Aruba. Ta importante pa inclui tur comprobante necesario cu e declaracion.

Dia 1 di juli ta ultimo dia
Servicio di Impuesto ta pidi tur cliente pa tene cuenta cu dia 1 di juli ta ultimo dia pa entrega e formulario. Riba e fecha aki no lo duna ayudo pa yena e formulario.

Lugar di entregamento
Por entrega e formulario na e sitio unda e cliente a haya ayudo, na oficina principal na Camacuri of na e loket di Servicio pa cliente na Oficina di gobierno na San Nicolas.
Alabes ta posibel pa deposita e formulario den e postbox na entrada principal di Servicio di Impuesto na Camacuri.

Trece copia
Servicio di Impuesto ta recomenda pa trece un copia di e formulario na momento di entrega esun original. Asina por pone un stempel riba e copia cual lo keda tambe como prueba di entregamento.

Servicio di Impuesto ta conseha pa no keda sin yena y entrega e formulario di declaracion. Door di yena y entrega e formulario na tempo, e cliente por evita un cobransa taxativo y ademas e tin oportunidad pa haci uzo di su derecho pa deduci e gastonan cu ta fiscalmente acceptabel. Si keda sin entrega e formulario of a entrega esaki laat, e cobransa lo inclui un boet di 5% di e impuesto cu un minimo Afl. 250,- y maximo Afl.10.000,-.

GERENCIA DI SERVICIO DI IMPUESTO
5 di juni 2009