Relaciona cu e training di alarma di candela na edificio BelFin ayera

Oranjestad – Relaciona cu e training di alarma di candela na edificio “BelFin” ayeramainta, e departamentonan: SIAD, Servicio di Impuesto y Departamento di Finansas ta gradici tur persona envolvi cu organisacion y ehecucion di e training aki. Na e team di calamidad di BelFin “BHV-team” y QESH Training & Consultancy N.V. cu a organisa y coordina e training, ta bay un danki hopi special. E ultimo lunanan e team di calamidad aki, bou guia di sr. Bernd Zalewsky di QESH N.V., a traha duro riba nan preparacion y awor nan por a demostra cu nan ta debidamente prepara. Gerencia ta conbenci cu e personal y e clientenan por ta trankil cu e team di calamidad lo sa di guia tanto e personal y e clientenan profesionalmente ora di cualkier eventualidad. Palabra di danki tambe na henter e personal, e clientenan pa nan cooperacion.
Gradicimento ta bay tambe na Cuerpo di Bombero, Cuerpo di Polis, Servicio di Ambulance y e Team di rescate di seccion Maneho di Crisis, cualnan tur a sa di actua rapidamente y na un forma profesional. Alabes un danki special na e team di Cruz Cora cu tambe a hunga un rol importante y a demostra nan profesionalismo tambe den e training aki.

E training di alarma di candela aki tawata sumamente importante no solamente pa duna contenido na e seguridad di e personal sino tambe na e seguridad di e clientenan. Por ultimo gerencia ta pidi disculpa pa e posibel inconvenencia cu e training por a causa.

GERENCIA DI:
SIAD
SERVICIO DI IMPUESTO
DEPARTAMENTO DI FINANSAS
12 di juni 2009