Si entrega e plachinan di number prome cu 1 di juli

ORANJESTAD – Relaciona cu pago di impuesto di vehiculo di motor 2009, Servicio di Impuesto ta participa cu tin chens cu no tin mester di paga un parti di e impuesto. Esaki ta conta pa e clientenan cu tin un vehiculo di motor cu no ta den uzo y cu no lo bay ta den uzo pa un periodo. Aki ta sigui mas informacion.

E condicionnan
Ta asina cu un cliente, cu tin un vehiculo di motor cu no ta den uzo y cu no lo bay ta den uzo pa un periodo, no lo tin mester di paga e impuesto di un of mas kwartaal durante aña. Esaki ta conta solamente si e cliente ta cumpli cu e siguiente condicionnan:
1. e cliente a entrega e plachinan di number na Servicio di Impuesto prome cu un kwartaal cuminsa y
2. e plachinan a keda aden pa un of mas kwartaal completo durante aña.

Entregamento di e plachinan
Un cliente por entrega e plachinan di number sea na oficina principal na Camacuri of na un oficina di gobierno den districto sea na Paradera, Santa Cruz, Savaneta of San Nicolas.
E cliente ta acudi cerca un cahero pa yena y firma un formulario. Pa medio di e formulario e cliente ta declara cu e ta entrega e plachinan di su vehiculo. Alabes mester duna e motibo pakico ta entrega e plachinan por ehempel: pa motibo di biahe largo, vehiculo ta daña etc.
Tambe ta posibel cu un miembro di famia ta entrega e plachinan di un vehiculo cu su doño a fayece.

Si e doño di vehiculo a fayece
Den caso di fayecimento di doño di vehiculo, e casa di e fayecido por autorisa un persona pa e haya e number. Eventualmente e herederonan tambe por laga pasa e number riba nomber di e persona cu nan ta desea. Tur heredero mester firma pa traspaso di number y ta apodera un persona pa regla esaki. Den un caso asina Servicio di Impuesto tin e formulario “Verklaring van geen bezwaar bij voertuig overdracht” cu e herederonan por uza. Despues mester entrega e carta di apoderacion, un notificacion di fayecimento di Censo y copia di un comprobante di identificacion valido di ambos persona.

Ta reserva e number pa e aña fiscal coriente
Servicio di Impuesto ta warda e plachinan di number solamente pa e aña fiscal coriente (2009).
Durante e periodo aki ta reserva e number tambe pa e doño di vehiculo. Despues di e aña fiscal aki, e cliente ta core riesgo di perde su number si acaso e no reacciona.

E dispensacion ta depende di e periodo cu plachi di number ta keda aden
E dispensacion ta depende tambe di con largo un cliente ta laga su plachinan di number aden.
Solamente si e plachinan a keda aden pa un of mas kwartaal completo, e ora e cliente no lo tin mester di paga e impuesto. Por ehempel: si e vehiculo ta daña pa un luna so durante un kwartaal y e doño a busca e plachinan bek, e ora toch mester paga e impuesto di e kwartaal ey completamente.
E dispensacion no ta conta pa cada luna cu e plachi a keda aden sino pa cada kwartaal completo.

No tin dispensacion cu forsa retroactivo
Pa e vehiculonan cu ya pa algun tempo no ta den uzo y awor ta entrega e plachinan, no tin dispensacion di impuesto pa e kwartaalnan cu a pasa caba of e kwartaal cu a cuminsa caba. E dispensacion no ta bay cu forsa retroactivo. Manera ya menciona, pa haya dispensacion e cliente mester haci un declaracion y entrega su plachinan di number prome cu e kwartaal cuminsa, sino toch mester paga e impuesto. Corda cu mester paga e impuesto delanta.

E dispensacion no ta conta pa gasto di plachinan
Un cliente por haya dispensacion pa e impuesto solamente y no pa gasto di e plachinan. Semper toch e cliente mester paga Afl. 20,- pa e gastonan aki.

Dispensacion na e momentonan aki
Un cliente cu entrega su plachinan na e momentonan aki no por haya dispensacion mas pa e prome y di dos kwartaal di aña 2009 (januari te cu juni). E plachinan di number cu keda entrega na e momentonan aki lo por cai bou dispensacion di impuesto pa e di tres kwartaal, esta juli, augustus y september 2009. E cliente mester entrega e plachinan di number na Servicio di Impuesto en todo caso prome cu dia 1 di juli 2009 (prome cu e kwartaal nobo cuminsa).
Manera menciona e cliente mester tene cuenta si, cu den caso e busca su plachinan bek durante e kwartaal aki esta durante e luna di juli, augustus of september, e cliente lo mester paga e di tres kwartaal aki toch completamente.

GERENCIA DI SERVICIO DI IMPUESTO
25 di juni 2009