Diaranson awor ta ultimo dia pa haci e peticion

Oranjestad – Servicio di Impuesto ta participa cu tin posibilidad pa pidi prolongacion di termino pa entregamento di e formulario di declaracion di inkomstenbelasting 2008. Esaki ta sumamente importante pa e clientenan cu no ta alcansa pa entrega nan formulario na tempo, esta dia 1 di juli proximo. E ultimo dia pa entrega e peticion pa prolongacion di termino ta diaranson awor, dia 1 di juli. Mester tene cuenta cu no lo honra e peticionnan cu drenta despues di e fecha aki.

Prolongacion di termino ta nifica cu e cliente lo haya 2 luna mas di tempo pa cumpli cu entregamento di e declaracion. Pa haci e peticion e cliente ta yena y entrega e formulario “AANVRAAG EERSTE UITSTEL
indiening aangifte inkomstenbelasting/premies volksverzekeringen”.
Por haya e formulario aki na oficina principal na Camacuri of na Oficina di gobierno na San Nicolas.
Alabes ta posibel pa baha e formulario for di e website www.siad.aw. E cliente cu ta desea por haci e
peticion via internet tambe na e website menciona. Tur cliente cu haci un peticion pa prolongacion di
termino lo ricibi despues un contesta por escrito den cual Servicio di Impuesto ta notifica si a honra e
peticion of no.

Ta importante pa e clientenan kendenan a ricibi e formulario di declaracion, yena y entrega esaki. Asina
e cliente ta declara e entrada cu realmente el a gana. Ademas e ta haci uzo di su derecho pa deduci su
gastonan cu ta fiscalmente acceptabel.
Keda sin entrega e declaracion ta nifica cu e cliente ta core riesgo di haya un cobransa taxativo. Esaki ta nifica cu lo haci un calculacion di e entrada fiscal na momento cu ta saca e cobransa definitivo. Un
cobransa taxativo normalmente ta sali inclui e boet pa incumplimento di declaracion. E boet aki ta 5% di e impuesto, minimo Afl. 250,- y maximo Afl.10.000,-. E boet aki ta conta tambe pa esnan cu entrega nan formulario laat.

GERENCIA DI SERVICIO DI IMPUESTO
26 di juni 2009