Si e cliente no a keda satisfecho cu e servicio

Oranjestad – Servicio di Impuesto ta recorda su clientenan cu desde juni ultimo tin un maneho
special pa atende cu eventual keho riba su servicio. SIAD a introduci e maneho aki cu ta conta
tanto pa Servicio di Impuesto, Servicio di Aduana y SIAD. Riba e topico aki ya a emiti un
comunicado di prensa na juni ultimo y a cuminsa cu un campaña di informacion pa pone e
clientenan na altura di e posibilidad pa entrega un keho.

Manera conoci, Servicio di Impuesto ta un organisacion cu ta duna servicio diariamente na un
cantidad grandi di cliente. Su empleadonan ta haci nan best pa duna servicio mas miho posibel.
Toch por sosode cu e cliente ta haya cu algo no a bay bon. E no a keda satisfecho cu e servicio
ricibi y ta sinti e necesidad di expresa su mes. E ora e cliente por entrega un keho den cual e ta
trece su experiencia dilanti.

E motibonan
Por tin diferente motibo pakico un cliente por entrega un keho por ehempel:
- e cliente no a haya e informacion rekeri;
- e cliente no a haya un cita;
- e cliente no a ricibi un documento riba e fecha palabra;
- e organisacion no a contesta telefon of a keda pasa e yamada sin resultado
satisfactorio.
Apesar cu tur keho ta importante, toch tin algun tipo di keho cu Servicio di Impuesto no lo trata
por ehempel:
- keho publica den prensa;
- keho anonimo;
- keho riba e contenido di un ley y e stipulacionnan pa cu e ehecucion.

E carta di keho
Pa entrega un keho e cliente mester haci esaki por escrito of e por autorisa un otro persona. E
cliente mes por skirbi e carta of ta yena un formulario cual ta obtenibel na oficina principal di
Servicio di Impuesto. E carta mester contene e siguiente datonan:
- nomber, adres y firma;
- e fecha, e sitio di e incidente y si ta posibel e orario;
- un descripcion cortico y cla di e keho;
Despues e cliente ta deposita e keho den e buzon di keho na oficina principal di Servicio di
Impuesto. Servicio di Impuesto lo registra esaki y lo manda un carta di confirmacion pa e cliente.
Siguientemente lo start cu tratamento di e keho durante cual lo haci un investigacion. Na final
e cliente lo ricibi un contesta por escrito di e resultado. Mester remarca cu lo trata un keho
cu tur seriedad y lo mantene tur informacion confidencial.

Servicio di Impuesto ta haya importante pa su clientenan ta satisfecho y ta reconoce e derecho
pa entrega keho. Alabes un keho ta un forma di feedback valioso riba e servicio di cual e
organisacion por siña di dje. Asina eventualmente por adapta e servicio na unda ta necesario
pa mehora esaki.

Pa mas informacion relaciona cu entregamento di keho por consulta e website www.siad.aw.
Via e website aki por download tambe e foyeto di keho y e formulario pa entrega keho.

GERENCIA DI SERVICIO DI IMPUESTO
27 di augustus 2009