Debi na terminacion di relacion di trabou

ORANJESTAD – Servicio di Impuesto kier duna e siguiente informacion specialmente na e empleadonan cu ta bay ricibi un lumpsum for di nan doño di trabou debi na terminacion di relacion di trabou.

Tarifa di loonbelasting
Na momento di bay haci cualkier pago di salario, e doño di trabou tin e obligacion di retene loonbelasting segun e tarifa normal. No obstante, ley ta permiti tambe aplicacion di e tarifa special cu ta 25%. E tarifa aki ta un porcentahe fiho y ta aplicabel solamente den casonan particular por ehempel ora tin compensacion en coneccion cu terminacion di relacion di trabou.
Mester remarca cu e tarifa special ta conta pa loonbelasting y no pa calcula prima di AOV/AWW y AZV. E doño di trabou ta retene e primanan aki manera e ta haci caba normalmente.

Terminacion di relacion di trabou
Si ta bay termina e relacion di trabou, hopi biaha e doño di trabou ta ofrece e empleado un suma como compensacion pa e añanan di servicio. Esaki por causa cu e empleado ta ricibi un suma relativamente halto den un solo biaha, un asina yama ‘lumpsum’, anto ora bay aplica e tarifa normal di loonbelasting, e belasting por resulta relativamente halto, cu consecuencia cu e empleado ta haya menos salario den su man. Den un caso asina, ley ta permiti pa aplica e tarifa special.

E tarifa special no ta obligatorio
E tarifa normal di loonbelasting ta esun obligatorio; e tarifa special (25%) ta un opcion y no ta obligatorio. E tarifa special ta un facilidad fiscal cu den cierto caso por sali beneficioso pa e empleado, pero e por sali tambe den su desbentaha. Mayoria bes e tarifa aki ta beneficioso ora e empleado ta ricibi un lumpsum relativamente halto por ehempel Afl. 20.000,- of mas.
Pa e empleado por haya un miho bista den e suma netto di lumpsum cu e lo ricibi, su doño di trabou por yuda den esaki. E doño di trabou ta haci dos calculacion. Uno aplicando e tarifa normal y otro aplicando e tarifa special di 25%. Si resulta cu e tarifa normal ta nifica menos loonbelasting (pues mas salario den man di e empleado), e ora no ta consehabel pa e empleado pidi pa aplica e tarifa special. Di otro banda, si resulta cu e tarifa special ta nifica menos loonbelasting y pues mas salario netto den man di e empleado, e ora si ta consehabel pa e empleado haci un peticion pa e tarifa special. Pues e doño di trabou por yuda e empleado haya un miho bista di e suma netto di e lumpsum y asina e empleado ta dicidi si e ta aplica pa e tarifa special of no.

Mester haci peticion
E tarifa special ta aplicabel riba peticion di e empleado. Pesey ta necesario pa e empleado entrega su carta di peticion hunto cu un copia di e combenio di terminacion di trabou na Servicio di Impuesto. Despues di maximo 5 dia di trabou, Servicio di Impuesto lo duna e empleado un carta di contesta, cual e empleado por pasa busca personalmente na oficina principal.
En principio Servicio di Impuesto no tin obhecion pa duna permiso pa aplica e tarifa special, pero mester remarca cu e tarifa aki no ta aplicabel riba tur compensacion di salario. Por ehempel, e no ta aplicabel riba pago pa dianan di vakantie. E ta aplicabel riba e parti di salario considera como un suma di rescate of ‘afkoopsom’.

Peticion colectivo
Den e dianan aki por a constata cu tin varios empresa ta ofreciendo un pakete na nan empleadonan debi cu nan ta terminando e relacion di trabou. Pa e casonan aki y pa facilita e proceso di peticion pa e tarifa special, Servicio di Impuesto ta ofrece e siguiente servicio.
E empleadonan ta duna nan doño di trabou un apoderacion pa e doño di trabou haci e peticion pa e tarifa special na Servicio di Impuesto. Siguientemente e doño di trabou ta entrega e lista di empleado na Servicio di Impuesto sea personalmente of via fax na number 522-7429. E lista di empleado mester contene e siguiente datonan:
- nomber di empleado;
- adres di empleado;
- number personal (persoonsnummer) di empleado;
- suma di lumpsum, preferibel specifica;
- copia di e combenio di terminacion di relacion di trabou.
Despues Servicio di Impuesto lo manda e doño di trabou un carta di contesta. E doño di trabou na su turno lo informa e empleadonan pa kendenan el a haci e peticion.
E servicio aki lo facilita e proceso di aplicacion pa esaki por bay mas rapido.

Pa mas informacion por tuma contacto cu Servicio di Impuesto na number 522-7423.

GERENCIA DI SERVICIO DI IMPUESTO
10 di september 2009