E di tres termino di pago ya a caduca dia 30 di september ultimo.

ORANJESTAD – Siguientemente Servicio di Impuesto ta informa riba e terminonan legal di pago di e cobransa di grondbelasting di aña 2009.

Dia 29 di mei ultimo Servicio di Impuesto a emiti un comunicado di prensa informando cu e cobransanan di grondbelasting di aña 2009 a sali. E cobransanan aki ta fecha 30 di juni 2009 y entre otro a informa tambe di e terminonan legal di pago.
E cliente cu no por paga su cobransa dentro di terminonan legal, por haci un peticion pa areglo di pago. Ta consehabel pa haci e peticion aki mas pronto posibel si, pa evita cu Servicio di Impuesto ta continua cu e proceso di cobramento cu gradualmente por bira mas severo. Pesey Servicio di Impuesto ta haya cu ta sumamente importante pa tene cuenta cu e terminonan aki ya cu de lo contrario esaki por tin consecuencia indeseabel pa e cliente.

Termino legal di pago
Na momento cu un cliente ricibi su cobransa e por scohe pa haci e pago den un solo biaha of dentro di e terminonan legal. Aki ta sigui un skema di e terminonan legal di pago cu ta conta pa e cobransa di aña 2009: 

Pues e prome y di dos termino di pago ya a caduca dia 30 di juli; e di tres termino tambe a caduca caba dia 30 di september ultimo. E di cuater termino di pago lo caduca dia 31 di december 2009. Esaki ta nifica cu na e momentonan aki e clientenan lo mester tin minimo 75% di e cobransa paga.

Areglo di pago
Den caso cu e terminonan legal di pago ta causa dificultad financiero, e cliente por acudi na Servicio di Impuesto pa haci un peticion pa areglo di pago. Na seccion Servicio pa cliente, e cliente por haci un peticion pa areglo di pago di maximo 10 luna. Pa areglo di pago di mas cu 10 luna e cliente mester haci un cita cu un funcionario specialisa den asunto di cobramento, un asina yama “invorderaar”, kende lo atende e cliente personalmente. Servicio di Impuesto ta evalua tur peticion y ta dicidi si ta honra e peticion of no.

Si no cumpli cu pago (na tempo)
Den caso cu e cliente no paga manera rekeri pa ley, e ora Servicio di Impuesto lo continua cu e proceso di cobramento automaticamente despues cu un termino di pago caduca. Mescos ta conta pa e cliente cu no a paga suficiente of no a cumpli cu su areglo di pago.
E proceso di cobramento ta encera cu e cliente lo ricibi por ehempel un aanmaning, un ordo di retencion riba salario (loonvordering) of dwangschrift. E proceso di cobramento gradualmente por bira mas severo y tur cos ta depende te con leu e cliente mes ta laga e proceso aki continua. Pues e cliente mes por evita un aanmaning, ordo di retencion riba salario etc.

Si no a ricibi e cobransa
Manera menciona Servicio di Impuesto a manda tur e cobransanan via post na final di mei ultimo. Na mes momento a percura tambe pa notifica tur cliente pa medio di un comunicado di prensa di cual e contenido ta publica tambe riba e website: www.siad.aw. Apesar di e esakinan toch Servicio di Impuesto a ricibi reaccion di hopi cliente cu nan no a ricibi e cobransa y cu nan no tawata na altura cu e cobransa a sali. Servicio di Impuesto kier aclarea cu esaki no ta den su man. No obstante, na e clientenan aki Servicio di Impuesto ta haci un apelacion pa acudi na su oficina principal of yama na telefon 522-7423 y pidi pa un duplicado di e cobransa di grondbelasting 2009.

Mas informacion
Ta consehabel pa tene cuenta cu e terminonan legal di pago y haci e pagonan manera ley ta stipula. Esaki ta importante pa evita cualkier inconvenencia.
Pa mas informacion encuanto e cobransa of areglo di pago, por acudi na seccion Servicio pa cliente na oficina principal situa na Camacuri 2 of na Oficina di gobierno na San Nicolas. Aki e cliente por pidi tambe un duplicado di e cobransa, si acaso mester.

Pa finalisa, Servicio di Impuesto ta conseha tur cliente pa lesa e texto imprimi riba e cobransa cu hopi atencion y asina e clientenan ta pone nan mes miho na altura tambe di e tipo di cobransa aki.

GERENCIA DI SERVICIO DI IMPUESTO
29 di oktober 2009