Tur empleado por haci peticion pero mester tene cuenta cu e condicionnan

ORANJESTAD – Servicio di Impuesto ta participa na tur persona cu tin salario, pues nan ta den servicio
di un doño di trabou, cu nan por haci peticion pa reduci e suma di salario anual cu e doño di trabou ta
calcula pa aña 2010 cu e meta pa reduci tambe e impuesto di salario (loonbelasting) cu mester paga
durante aña 2010.

E condicionnan
Pa un empleado por bin na remarca pa haya eventualmente un reduccion di su impuesto di salario
(loonbelasting), e mester cumpli cu e siguiente condicionnan.
1. E empleado mester haci peticion na Servicio di Impuesto.
2. E empleado mester a entrega su formulario di declaracion di inkomstenbelasting 2008.
3. E empleado no mester tin debe habri of si e tin un debe habri e mester tin un areglo di pago cu e
ta cumpliendo cu ne of e cliente mester a pidi y haya posponemento di pago en conexion cu
restitucion cu e ta spera.

Haci peticion
Pa haci peticion e empleado ta yena e formulario “verzoek vermindering loon” di aña 2010. Pa medio di
e formulario menciona, e empleado ta declara e calculacion di su entrada(nan) y e interesnan di su
fiansanan di aña 2010. Gasto di interes y prima di seguro ta e unico tipo di gastonan permiti pa deduci
den e evaluacion di salario. Por ehempel interes di hipoteca/fiansa riba e cas unda e doño ta bibando of interes di fiansa personal, auto etc.
Por haya e formulario via e website www.siad.aw. Despues ta entrega e peticion hunto cu e
comprobantenan necesario na Servicio di Impuesto sea na su oficina principal of na e loket di servicio pa cliente na Oficina di Gobierno na San Nicolas.

Mester entrega e declaracion di inkomstenbelasting 2008
Por wak loonbelasting como un pago delanta riba e inkomstenbelasting. Si influencia e loonbelasting
durante aña 2010, esaki por tin consecuencia pa e cobransa definitivo di inkomstenbelasting 2010.
Pesey semper Inspector mester por evalua tambe e entrada fiscal cu a wordo declara den e ultimo
declaracion (aangifte) di inkomstenbelasting (2008). Pa e motibo aki un di e condicionnan ta cu e
empleado cu eventualmente kier haya reduccion di su loonbelasting, mester tin su declaracion di
inkomstenbelasting 2008 entrega tambe, sino lo no trata e peticion.

E empleado no mester tin debe habri of si e tin un debe habri e mester tin un areglo di pago
Hopi biaha ta sosode cu un empleado tin debe habri riba cual e no ta pagando. Si e empleado haya
reduccion di loonbelasting, e ta bira mas dificil pa Servicio di Impuesto por cobra e suma habri despues.
Pesey pa por honra e peticion, manera ya menciona un di e condicionnan ta cu e empleado no tin debe
habri of e mester tin un areglo di pago cu cual e ta cumpliendo debidamente of e cliente mester a pidi y
haya posponemento di pago en conexion cu restitucion cu e ta spera.

Kico kiermen reduci e suma di salario anual calcula?
Ta asina cu tur aña – na januari – tur doño di trabou mester calcula e salario anual di cada empleado. A
base di e calculacion y e declaracion di e empleado (werknemersverklaring), e doño di trabou ta
determina cuanto loonbelasting y prima di seguro social (AOV/AWW y AZV) e mester retene di e
empleado. Si e suma di salario anual bira menos e ora e loonbelasting cu e empleado mester paga
tambe ta bira menos di forma cu e empleado ta haya mas placa den su man ora e cobra.
Kiermen, reduci e suma di salario anual, cual ta un suma calcula, no ta nifica cu e empleado lo haya
menos salario. E suma real di salario bruto ta keda mescos, solamente e empleado ta bay haya mas
placa den su man pasobra e ta bay paga menos loonbelasting.

Inkomstenbelasting y Loonbelasting
Ora di haci declaracion di inkomstenbelasting e empleado no solamente ta declara su salario(nan) pero
tambe su otro entradanan. Ademas e empleado tin derecho di deduci entre otro su gastonan personal
por ehempel interes di hipoteca y interes di fiansa personal. Door di deduci gasto e empleado ta baha su entrada fiscal y ta paga menos inkomstenbelasting. Si e entrada di e empleado ta consisti unicamente di salario, e ora mayoria biaha ta resulta cu e empleado a paga di mas na loonbelasting y lo mester haya restitucion di loke el a paga di mas.
Den caso cu tin indicacion cu e empleado lo mester haya placa bek, e ora e empleado por scohe pa
warda te ora cu su cobransa definitivo di inkomstenbelasting sali of e por haci un peticion pa reduccion di su salario anual (cu e doño di trabou ta calcula) y asina e ta paga menos loonbelasting durante aña.
Pues si e empleado ta scoge pa reduci e suma calcula di su salario anual, e ta haya su placa bek pero
no den un solo biaha ora e haya su cobransa definitivo di inkomstenbelasting 2010, pero tiki tiki durante aña 2010 mes.

Decision
Inspector ta evalua tur peticion y ta dicidi si e persona/empleado lo por bin na remarca pa eventualmente haya reduccion di loonbelasting. Si esey ta e caso, e empleado lo ricibi e decision por escrito cual e ta entrega na su doño di trabou. Un empleado por haci peticion unicamente un biaha durante aña. Si e empleado ta spera un cambio di salario grandi, ta consehabel pa e warda te ora esey sosode y despues e ta haci su peticion.

Pa mas informacion por tuma contacto cu Servicio di Impuesto na tel. 522-7423 of pasa personalmente
na seccion Servicio pa Cliente na oficina principal na Camacuri of Oficina di Gobierno na San Nicolas.

GERENCIA DI SERVICIO DI IMPUESTO
16 di december 2009