Conseho na tur doño di vehiculo di motor

ORANJESTAD – Servicio di Impuesto ta conseha tur doño di vehiculo di motor cu den e temporada aki ta hayando nan plachinan di number pa aña 2010 pa deshaci di e plachinan bieu (di aña 2009) cuidadosamente.

Na momento cu un cliente a paga su impuesto y a haya su plachinan di number valido pa aña 2010, e por pone nan di biaha riba su vehiculo. Na mes momento e cliente por scoge pa benta e plachinan di aña 2009 afo. Riba esaki Servicio di Impuesto kier pone na conocemento di su clientenan pa ta hopi cuidadoso ora di deshaci di e plachinan bieu y no djis benta esakinan den bar’i sushi sino destrui esakinan prome.

Ta asina cu e plachinan di aña 2009 ta valido te cu dia 15 di februari 2010. Cualkier persona cu mal intencion cu haya e plachinan aki por uza esakinan trankilamente por ehempel pa joyriding, comete atraco of ladronicia. Alabes por tin situacion di un accidente of hit & run. E persona riba kende e number ta registra eventualmente lo por haya su mes den un situacion hopi fastioso cu husticia.

Pesey un conseho na tur doño di vehiculo di motor pa si acaso ta bay benta e plachinan bieu afo pa destrui esakinan bon prome. Hasta ta miho pa mientrastanto warda e plachinan bieu bon y despues di dia 15 di februari 2010 destrui y benta nan afo.

GERENCIA DI SERVICIO DI IMPUESTO
17 di december 2009